అక్కినేని హీరో నాగ చైతన్య మరియు తెలుగు నటి శోభిత ధూళిపాళలు, డిసెంబర్ 4న వివాహం చేసుకుని ఒకటయ్యారు. ఇప్పుడు, పెళ్లి అయిన నాలుగు నెలలకే, ఈ జంట తమ అభిమానులకు ఒక శుభవార్తను ప్రకటించారు. తాజాగా, వారు ‘స్కుజీ’ (Scuzi) అనే పేరుతో ఒక ఫుడ్ బిజినెస్‌ను ప్రారంభించారు.
నాగ చైతన్య సోషల్ మీడియా ద్వారా ఈ విషయాన్ని తెలియజేస్తూ, ప్రపంచవ్యాప్తంగా అనుభవించిన రుచులను అందరికీ చేరువ చేయాలనే ఉద్దేశంతో ఈ వ్యాపారాన్ని ప్రారంభించినట్లు తెలిపారు. “ప్రపంచవ్యాప్తంగా ఉన్న అద్భుతమైన తినుబండారాల నుండి ఆహారాన్ని, రుచులను రుచి చూడటానికి నాకు అవకాశం లభించింది. ఉత్సాహంతో, నేను ‘షోయు’ని పరిచయం చేసాను. మాకు లభించిన ప్రేమ ఇప్పుడు అద్భుతమైన కొత్త భాగస్వాములతో – ‘స్కుజీ’ని మీ ముందుకు తీసుకురావడానికి నన్ను ప్రేరేపించింది,” అని నాగ చైతన్య పేర్కొన్నారు.
ఈ శుభవార్తను తెలుసుకున్న అభిమానులు, నాగ చైతన్య మరియు శోభితలకు సోషల్ మీడియా ద్వారా శుభాకాంక్షలు తెలియజేస్తున్నారు. వారి కొత్త వ్యాపారం విజయవంతం కావాలని ఆకాంక్షిస్తున్నారు.
ఇదిలా ఉండగా, పెళ్లి తర్వాత నాగ చైతన్య నటించిన ‘తండేల్’ సినిమా బ్లాక్ బస్టర్ హిట్‌గా నిలిచింది. ఇప్పుడు, ఆయన తన భార్య శోభితతో కలిసి వ్యాపార రంగంలోకి అడుగుపెట్టి, సినీ రంగంతో పాటు వ్యాపారంలోను రాణించాలని లక్ష్యంగా పెట్టుకున్నారు.